काठमाडौं, असार ६ -

राष्ट्रिय खेलकुद परिषदका पूर्व सदस्य सचिव शरदचन्द्र शाहको ६६ वर्षको उमेरमा निधन भएको छ । मृगौला रोगबाट पीडित शाहको उपचारका क्रममा सिंगापुरमा नेपाली समय अनुसार वुधवार दिउँसो साढे ३ बजे निधन भएको राखेपका पूर्व कोषाध्यक्ष विष्णुकुमार श्रेष्ठले जानकारी दिनुभयो । शाह सदस्य सचिव रहेका बेला राखेपको कोषध्याक्ष रहेका श्रेष्ठका अनुसार शाहको विहीवार सिंगापुरमा नै अन्त्यष्टी गरिने र अस्तु मात्र नेपाल ल्याउने तयारी परिवारले गरेका छन् ।

२०३४ सालदेखि लगातार ११ वर्षसम्म राखेपको सदस्य सचिव रहेका शाह दक्षिण एशियाली खेलकुद सागको परिकल्पनाकार हुनुहुन्थ्यो । उहाँकै पहलमा पहिलो साग नेपालमा नै भएको थियो । २०४५ साल फागुनमा हुरी बतासका कारण दशरथ रंगशालामा ७२ जनाको ज्यान गएपछि नैतिकताका आधारमा शाहले सदस्य सचिवबाट राजीनामा दिनुभएको थियो ।